Loading...

quarta-feira, 23 de maio de 2012

Primeira Dama TL Garante, TMR Sei Realiza Nia Promesa

STL, 23 Maiu 2012

PR TMR ho Familia
DILI - Premera Dama RDTL, Isabel Ferreira hateten, Prezidenti Republika Taur Matan Ruak (TMR), sei realiza promesa nebee nia hatoo ba povu Timor-Leste (TL) durante nee kampanha eleitoral iha eleisaun prezidensial fulan hirak liu ba.

Nia dehan, kona ba knaar servisu nudar Prezidenti Republika nee TMR preparadu ona, tamba nia mai ho vizaun ida klaru.

“Saida maka nia (TMR-red) halo ba Nasaun TL, ho pontu 5 nebee klaru durante iha kampanha nia fo sai, nunee mos prioridade ba povu nia moris, programa iha pontu 10. Needuni nia preparadu atu inplementa hodi hadia povu nia moris,” dehan Isabel ba jornalista sira iha Centru Convensaun Dili, Tersa (22/05).

Espoza TMR nian nee hanoin katak, knar Prezidente Republika nee sempre iha dezafiu, nudar ema moris, iha nia vida laiha buat ida fasil. Isabel rasik senti orgullu tebes wainhira TMR sai prezidente liu husi prosesu ida ke difisil teb-tebes. Tamba kandidatu barak mak kompete, maibe ikus mai, TMR konsege tama eleisaun sigunda volta hetan vorus maioria hodi manan.

Iha parte seluk, Antonino Sarmento nudar joven, hateten, sira mos hein PR Taur Matan Ruak nia promesa nebee nia hatoo iha kampanha nia laran.

“Promesa nebee Prezidenti Taur Matan Ruak halo nee importante tebes ba povu nia moris, tamba nee prezisa realiza, labele lohi deit povu kuandu iha tempu difisil,” katak Antonino.

Nunee mos Rita Rogrigues, hatutan, povu nia moris iha lideransa nasaun nia liman, tamba nee presiza hadia povu nia moris ba futuru ho diak no susesu.

Komunidade Husu TMR Realiza Nia Promesa

“Parabens Ba Prezidente Foun Taur Matan Ruak”. Ida nee mak lia fuan nebee mai husi komunidade liu-liu sira nebee hela iha area Kaikoli-Dili. Maski nunee sira mos husu ba Prezidente foun atu realiza buat nebee mak nia promete ona ba povu tomak bainhira halo ninia kampainha.

“Hanesan komunidade ou povu rai ida nee, ami hatoo ami nia parabens ba ita nia Prezidente Foun Taur Matan Ruak nebee mak foin simu posse iha loron Sabdu 19 kalan, no ami mos husu ba Prezidente TMR atu lalika haluha buat nebee mak nia promete ona ba iha povu tomak rai ida nee, iha ninia kampainha no tenke halo tuir saida mak nia koalia ona iha kampainha laran, atu nunee povu hotu bele fiar,” hateten Francisco ba STL iha ninia hela fatin, Kaikoli-Dili, Tersa (22/05).

Nia husu mos ba PR foun atu tau atensaun ba sira nia bairro Kaikoli, hodi nunee iha tempu udan, sira labele hela nafatin iha bee leten, tanba durante tinan barak ona, laiha ema ida mak atu tau atensaun ba sira nia hela fatin.

Alende nee Manuel da Silva mos hateten, maske buat nebee mak PR TMR promete ona la halo hotu, maibe persiza realiza ida ou rua, atu nunee povu kontinua fo fiar nafatin no labele lakon fiar ba PR TMR.

“Ita labele husu buat barak husi ita nia Prezidente foun atu realiza hotu buat nebee mak nia promete ona. Maske la realiza hotu, maibe presiza realiza ida ou rua, atu nunee ba oin povu labele lakon fiar ou konfiansa ba Prezidente foun. Se lae orsida povu bele dehan ita bosok malu deit,” dehan Manuel.

Iha fatin hanesan, Paula Ferreira, hanoin katak, importante liu ba sira feto no labarik mak moris hakmatek no moris iha dame no pas nia laran. “Hanesan feto no labarik ami la ejiji buat barak husi Prezidente foun Taur Matan Ruak, maibe ami nia hakarak mak moris hakmatek no moris iha pas no dame nia laran. Ami lakohi moris iha terus no susar nia laran hanesan krize nebee mak mosu iha tinan 2006 liu ba,” dehan Paula. alm/ato

Sem comentários:

Enviar um comentário

counter for blogger
FETO-ALOLA FETO-ONU REDE-FETO FETO-EDUCA SAI-FETO FETO-JOVEM FETO-TIMOR FETO-LINKS