Dezenvolvimentu TL Makaas, Kompara ho Tinan 10 Kotuk

STL, 23 Maiu 2012

D. Basilio Nacimento

DILI - Bispu Diocese Baucau, Dom Basilio do Nascimento, haree katak dezenvolvimentu iha Timor-Leste (TL) lao makaas kompara ho tinan sanulu liu ba.

"Hau orgullu tanba agora se ita haree ba kotuk kompara ho rai seluk iha tinan 10 nia laran, dezenvolvimentu lao makaas hanesan diskursu Prezidenti Taur Matan Ruak dehan katak, iha tinan 10 liu ba, ita hahu ho liman mamuk (orsamentu ki’ik), ohin loron se ita hateke ba kotuk, ita haree katak iha ita nia rai laran buat lubuk ida lao paz, seguransa, dezenvolvimentu,” hateten Dom Basilio ba STL bainhira partisipa iha komemorasaun loron restaurasaun independensia ba dala 10 iha Palacio Prezidenti Aitarak Laran, loron hirak liu ba.

Tuir Amu Basilio, hanesan ema moris, dedikasaun, deskobre dignidade, needuni iha tinan 10 nia laran lao dadaun, identifika buat lubuk ida nebee diak no seidauk diak.

“Ita nia oin iha uma laran rasik kala aat hela, maibe ita nia oin ba liur ema gava ita, tanba tuir kriteria nebee ema fo hodi haree oinsa moris iha estabilidade no paz. Ema konsidera ita hanesan pais ohin loron miavel ho kriteria hirak nee hotu,” nia komenta.

Nia husu ba Timor oan hotu atu keta haluha katak, iha tenpu ida ema konsidera Timor hanesan pais pos konflitu, pais failladu, pais frazil, pais miavel no Singapura bolu Timor dehan pais marjinalidade, neebe naran hirak nee hotu hatudu oinsa mak ema haree ba Timor.

“Ita mos keta haluha katak, iha tempu ida ema konsidera ita hanesan pais pos konflitu, pais failladu, pais frazil, pais miavel no Singapura bolu ita dehan pais marjinalidade, neebe naran hirak nee hotu hatudu oinsa mak ema haree ba ita. Maibe ohin kuandu hatete katak, ita pais miavel nee hau hanoin katak, situasaun diak ida ba ita,” tenik Dom Basilio.

Bispu Basilio hanoin, agora iha tinan 10 tuir mai, iha tempu atu bale hadia diak liu tan buat nebee presiza, mais sei falta hela ida nee haree oinsa para bele hadia. “Ita mos bele halo balansu ida katak iha tinan 10 nia laran, ita konsege realiza ita nia forsa da paz oinsa ita hemeno ba malu atu bele moris iha paz. Maibe iha tinan 10 oin mai, hau hanoin iha buat rua mak ita bele halo diak liu tan, nee mak unidade ho dezenvolvimentu,” katak Amu Bispu.

Dezenvolvimentu, tuir Bispu Diocese Baucau nee, ba nia parte laos atu halo uma boot ka halo luron kapaas, maibe dezenvolvimentu ba nia mak fo kapasidade ba Timor oan ida-idak nebee mak laiha kbiit hodi bele dezenvolve nia aan hanesan ema. Dezenvolvimentu laos dehan rikeza material maibe dezenvolvimentu oinsa haree ba ema nia rikeza.

“Iha Timor nee iha buat lubuk ida mak ita haluha tiha, hanesan ema ita haluha tiha atu dezenvolve, iha funu nee halo ita lakon tiha ita nia kualidade balun, ita mos ema nebee pasiensia, simu ema dor, laran maus no ema nebee laran diak, neebe iha funu nee halo kualidade barak mak lakon,” dehan Amu Basilio. Nia sujere, iha tempu ida tinan 10 mai nee, Timor koko took oinsa mak bele valoriza nia aan hanesan ema Timor ho nia kualidade, diferente maibe tenki hanesan ema.

“Buat nebee mak hau mehi mak unidade. Unidade nee laos deit iha rai laran, maibe unidade nee hau hanoin hela kona ba situasaun moris nian, oinsa mak Timor bele kria situasaun, kria kondisaun hodi Timor oan hotu bele aproveita, tanba Timor so kompletu bainhira Timor oan hotu iha no senti Timor nee mahon ka hanesan ai-hun nebee fo mahon ba sira hotu,” hateten Dom Baisilio. lia/alm