DILI - Prezidenti Partidu Trabalhista, Angela Freitas ofisialmente kandidata aan ba Prezidenti Republika. Maski deklara aan nudar kandidatu independente, maibe Angela mos hetan suporta husi Partidu Trabalhista.“Hau ofisialmente kandidata hau nia aan ba Prezidenti da Republika nee ho inisiativa indepedenti, maibe suporta husi Partidu Trabalhista. Tamba Prezidenti Republika nee reprezenta povu,” dehan Angela ba jornalista sira iha Kampu Demokrasia, Dili, Tersa (10/01).
Tuir Angela, em prinsipiu kuandu sai Prezidente Republika nee tenki hakuak ema hotu-hotu. Tamba nee atu kandidata husi partidu ka independente mos hanesan hotu deit. Sai Prezidente Republika nee reprezenta nasaun no servi povu ida nee. Prezidente Republika tenki husik ninia interese individu no partidariu, hodi servi loloos povu.
Ho hanoin ida nee, Angela dehan, nia anunsia ninia kandidatura ho independente, no reforsa tan husi Partidu Trabalhista nebee nia rasik prezidi.
Nia haree katak iha eleisaun prezidensial tinan nee, nia sei manan tamba konkore ba eleisaun kandidatura hotu-hotu hakarak atu manan. Nia rasik fiar metin ba programa, vizaun no solusaun nebee nia sei lori hodi kompete iha eleisaun prezidensial nee.
Iha fatin hanesan, Abilo da Costa Freitas, hateten, nudar militantes no simpatizantes Partidu Trabalhista nian, sira sei suporta sira nia kandidatura, tamba kandidatu ida nee maka bele lori nasaun no povu ida nee ba oin.
“Ho ninia programa no planu atu hadia povu no hasees povu husi kiak no mukit, needuni nudar militante partidu nian, ami kaer metin prinsipiu ida nee, hodi lori nasaun nee lao ba oin ho diak," nia hateten ho esperansa boot.
Nunee mos Emelita Ribero hatutan, nudar povu, sempre prontu atu suporta feto nebee kandidata aan ba Prezidenti Republika, tamba nasaun ida nee feto mos iha dereitu atu kompete ho mane sira. alm
STL, 11.01.2012
Sem comentários:
Enviar um comentário