DILI - Sekretariu Estadu Promosaun Igualidade (SEPI), koopera hamutuk ho Fundasaun Alola realiza konferensia feto Asia Pasifiku ba dala rua, iha Dili durante loron tolu nia laran, 29 Setembru too 1 Outubro.
Konferensia ida nee suporta husi Organizasaun Asia Pasifiku Forum on Women Law and Development (APWLD), ne’ebé partisipa husi reprezentante feto, aktivista no akademiku husi nasaun 27.
Konferensia nee deskuti kona ba oinsa haforsa feto nia lian iha polítiku no governasaun. Abertura ba konfrensia nee halao direitamente husi SEPI, Idelta Rodrigues, akompaina husi Diretora Fundasaun Alola, Kirsty Sword Gusmão, Direitora Fokupers, Maria Barreto, Direitor Redi Feto no organizasaun nasionál no internasionál sira iha Dili.
Hamutuk reprezentante feto 38 husi nasaun 27, mak hanesan Papua Nova Guine, Indonesia, Timor-Leste, Malaysia, Filipina, India, Thailandia, Quirguistao, Fiji inklui atual eis feto parlamentares Tursunia, Kadyrova.
Pontu Fokal Organizasaun Asia Pasifiku Forum on Women Law and Development (APWLD), Cristina Palabay, informa katak, konferensia nee atu mantein APWLD nia misaun hodi haforsa feto iha mundu, liu-liu partisipasaun iha nivel polítika, hodi prepara mos feto atu hasou efeitu husi globalizasuan, fundamentalismu no militarizasaun.
Reprezentante Grupu Feto Parlamentar, Aisa Baserawan, hateten, TL agradese ho konferensia ne’ebé iha, tamba bele dudu di’ak liutan partisipasaun feto iha polítika lao di’ak liutan.
Nia dehan, maske TL nu’udár nasaun foun, maibé iha nivel polítika, militar no areia seluk tan, feto Timor partisipa makaas hodi fo kontribuisaun ba dezenvolvimentu.
“Hanesan feto parlamentar, hau agradese tebes, tanba konferensia nee ami deskuti atu reforsa feto partisipa iha nivel polítika bele ativu di’ak liutan,” nia haktuir.
Ofisiál Ezekutivu nomos Fundador Forum Papua Nova Guine, Susan Setae, hateten katak, konferensia ne’e nu’udár fatin di’ak ba feto husi Asia Pasifiku atu halibur no harii solidaridade ba kampanha feto.
Nia hanoin katak, partisipasaun feto iha polítiku tempu agora importante, tanba kauza husi militarizasaun no globalizasaun sai dezafiu ba feto, partikularmente ba feto marjinal no kiak sira hanesan avansa ba sira nia partisipasaun iha polítiku liu husi sira nia luta ba governasaun di’ak no direitu humanu.
Reprezentante Feto Indonesia, Nusyandi Katjasungkana, haktuir, Indonesia mos durante tinan barak kontinua servisu makaas atu hasae nafatin partisipasaun feto iha polítika no tau matan ba problema feto rural.
Nune’e’e mos Direitora Ezekutivu Fundasaun Alola, Teresa Verdial, hatutan, konferensia nee nu’udár oportunidade diak ba feto Asia Pasifiku no TL hodi kontinua sira nia esforsu ba avansamentu igualidade jeneru iha nasaun foun hanesan TL.
Teresa Verdial reforsa tan katak, konferensia ne’e nu’udár reflesaun ida ba APWLD nia relasaun servisu ho Fundasaun Alola ho organizasaun feto TL. Fundasaun Alola rasik sai membru APWLD iha tinan 2009 hodi servisu hamutuk ho aliansa feto ASEAN iha 2010 hodi kontinua hanaruk koperasaun servisu nee ba futuru.
“Ita hetan esprensia diak, maske TL hanesan nasaun joven ida, aprende ona buat barak husi sira. Ezemplu ida maka sira mai vizita ba parlamentu nasinal, partisipantes sira hetan oportunidade atu interaktivu ho membru feto parlamentu balun atu haree oinsa sira hotu hasees diferensia partidu polítiku atu hola parte ida iha grupu parlamentar hodi servisu hamutuk atu hakbiit no dezenvolve feto hanesan inspirasaun no korajen,” tenik nia.
Durante iha TL, reprezentante feto ka membru APWLD hasoru malu mos ho grupu feto parlamentar Timor-Leste no organizasaun Redi Feto, Fokupers ne’ebé tau matan ba kestaun feto TL. car (STL, 3/10)
Sem comentários:
Enviar um comentário