D. Alberto Ricardo Iha Knua STL: Timor Oan Tenki Tau A’as Dignidade Feto Timor

DILI - Bispo Dioseze Dili, D. Alberto Ricardo da Silva, Pr husu ba povu Timor hotu atu tau a'as dignidade feto Timor, tamba Timor oan mai husi kultura nebe respeita malu husi beiala sira, laos foti husi kultura na saun seluk.

Dom Alberto hatutan, timor oan tenki respeita feto tamba feto timor mos matenek maske feto timor balun metan, mutin. Iha Timor feto no mane dignidade hanesan, tan ne'e labele baku feto no hasai liafuan aat hasoru feto.

“Ita timor oan tenki respeitu feto, konsidera feto importante, labele baku no labele fosai liafuan aat ba ita nia inan feto sira. Hau rona feto timor terus barak, ne'e labele," D. Alberto fosai liafuan hirak ne'e wainhira sorumutu ho manejemen, jornalista ho staf STL media Corporation iha Knua STL Sukrikmas-Fatumeta, Dili, Sesta (3/2/2012). D. Alberto Ricardo da Silva iha vizita dahuluk ba STL Corporation nee besik oras rua nia laran.

Feto ka mane katak D. Alberto iha nivel nebe hanesan, tan ne'e Bibi Atan ba Dioseze Dili ne'e fokorazen ba feto Timor oan labele moe fosai ema balun nebe mak la respeita sira. Amo Bispo hatutan ho apelo ba Timor oan tomak tenki respeita feto hanesan maromak.

Iha sorumutu ne'e, D. Alberto Ricardo ho familia bot STL nee, alem de apelo ba sosiedade Timor atu respeita ho foti dignidade feto nian iha nasaun foun nee. Amo Bispo mos koalia kona ba papel media nian, nomos STL tenki uza tetun mak diak ho los atu ema hotu bele hatene no kompriende notisia sira nebe fosai.

Komunikasaun sosial importante

Relasiona ba papel komunikasaun social Amo hatete katak komunikasaun social iha papel importante tebes iha sector edukasaun.Edukasaun ohin loron importante tebes iha mundo modern ohin loron, tamba ema halo runggu-rangga, moras no problema barak mak mosu. Buat sira nee hotu mosu tamba edukasaun nebe hahu hosi familia laran kurang, nune mos iha eskola sira.

"Tamba nemak, papel media nia importante tebes atu eduka ema, muda ema nia hanoin, muda ema nia hahalok ba diak," katak Amo Ricardo nebe hatutan hodi hameno ba jornalista STL sira atu hakas an, buka serbisu ho diak, hatudo kualidade ho profesionalismo hodi lao baoin.

Tuir D. Alberto, Igreija apresia teb-tebes papel meius komunikasaun nian, neduni husu STL atu informasaun nebe fosai laos notisia bain-bain maibe informasaun sira mak fosai nee, bele transforma mos ita nia sosiedade. Tamba nemak Amo Bispo husu mos ba jornalista sira atu hadia sira nia, hakasan no serbisu ho dignidade no professional.

Tetun diak

Bispo Dili fo mos hanoin katak, atu mensajen nebe hatoo liu hosi media atu ema hatene, lia tetun tenki uza ho hakerek diak, atu nune'e ema bele komporende. Labele hakerek lia tetun nebe halo ema konfuzaun, tamba se lae ema lakon tempu atu le'e jornal, la konsege hatene saida objektivu ikus notisia nee nian.

"Ita hakerek buat ida ema le'e koran tenki kompriende, Tetun ne'e tenki hakerek diak, imi hakerek fraze tenki badak atu ema le'e kompriende. Dala ruma imi nia hanoin diak, tema tema nebe foti diak maibe ema le'e lakompriende, tamba uza lia tetun lalos. Needuni, bainhira hakarek halo reflesaun oituan. Hodi hakerek lia tetun mak diak," tenik Dom Alberto.

Amo Bispo Ricardo mos fo exemplo ba liafuan balun iha tetun nebe los. Bainhira feto kaben nain tenki uza liafuan Kaben laos fen. Fen nee uza ba feto nebe kama rua. Nune mos lia fuan kabok nee uza ba animal maibe ba ema uza lia fuan Ko'us ga Tur Ahi.

Iha biban nee, Diretor Jeral STL Corporation Salvador J. Ximenes Soares agredese tebes ba vizita Amo Bispo D. Alberto. Vizita nee hatudu katak Igreija ho Amo Bispo Dili konsidera papel media nia nee importante tebes iha nasaun ho sosiedade laran. Tuir Salvador vizita Amo Bispo nia ne mos hanesan atu fo korajen, apoio moral atu jornalista sira STL nia bele halao nia knar ho diak. Molok atu hato'o lia fuan ruma, Amo Bispo vizita ho hare uluk sala redasaun STL jornal ho TV, studio STL TV ho sala design ho lay out.

Iha vizita nebe halao besik oras rua ne'e, D. Alberto simu ho akompanha husi Diretur Jeral STL Salvador, Deputy STL Domingos Saldanha, Manager Bisnis Florencio de Oliveira, Managing Editor Godinho Barros, Manejer Personalia Antonio Timotio Morreira, Manager Produsaun Mikael Mali Mau, Manajer teknika ho Operasaun Ramiro do Nascimento no Manager News Armandina Moniz. par/lay