Loading...

sexta-feira, 14 de maio de 2010

Rede Feto Hakuak Feto Ne’ebe Lakon

Written by Eva Almeida
Friday, 14 May 2010

CJITL flash, Organizasaun Naun Govermental Rede Feto konsidera partisipasaun feto iha prosesu dezenvolvimentu nasional importante tebes tanba ne’e persiza iha servisu hamutuk entre feto sira iha suku laran. Ho razaun ne’e REDE FETO hala’o dialogo ho feto maluk ne’ebe foin lalais eleitu no la eleitu iha eleisaun komunitaria atu nune’e bele tau ideia hamutuk oinsa bele dezenvolve suku laran.

“Ami hanoin katak oinsa atu dezenvolve feto maluk sira atu bele involve ba prosesu dezenvolvimentu nasional antau ita tenki hahu dezenvolve uluk Suku”, dehan Project Officer REDE FETO, Francisca Alves iha Aula Forum Komunikasi Perempuan (Fokupers), Kuarta, (12/05).

Nia mos dehan programa dialogu entre feto eleitu no la eleitu ne’e hanesan koragen ida ba feto maluk sira atu fo suporta malu iha prosesu hari’i nasaun Timor Leste.

Rezultadu husi dialogu ne’e sei halo rekomendasaun ba feto maluk ne’ebe eleitu sai lider komunitaria atu nune’e bele halo planu dezenvolvimentu iha rai ida ne’e liu husi sira nia dezisaun no servisu.

“Ami realiza dialogu ne’e ho objetivu katak, Feto sira bele fahe informasaun ba malu antes sira atu eleitu tanba dala ruma feto nebe la eleitu bele hatene liu fali no bele realiza buat ruma iha sira nia kargu”, katak Project Officer ne’e.

Partisipasaun mai husi Xefe Aldeia Feto mak eleitu iha elisaun 2009 ninian ho Feto maluk sira nebe mos kandidato maibe la eleitu partisipasaun sira nee iha tan partisipasaun balun mak hanesan Fasilitator tanba ami iha rekrutamentu ba Distrito Dili ami iha fasilitator nain sanulu (10) nebe mak suporta atu halao aktividade nee.

Kordenadora Projeitu UNDEF ba AUSAID, Maria Evelina Tilman hateten feto eleitu no la eleitu sira bele fahe esperensia ba malu atu nune’e sai hanesan lisaun ba sira para feto ne’ebe la eleitu bele hatene katak sira eleitu nia esperensia bele fahe ba feto la eleitu nebe agora prepara a’an hela hein elisaun mai tinan 2012.

“Hau hakarak hateten deit katak liu husi dialogo nee feto sira nebe uluk eleitu ona bele fahe sira nia esperensia ba feto nebe la eleitu hodi sira prepara’an atu hein elisaun mai 2012 “dehan tan evelina iha dailogo fatin 12/05/2010.

Maria Baptista nudar Xefi Aldeia Akadiruhun senti dialogu ne’e kapa’as tanba bele aumenta tan hanoin hodi ba hato’o tan maluk sira iha suku laran ne’ebe mak seidauk hatene konaba asuntu partisipasaun feto iha dezenvolvimentu nasional.

“Maske hau foin premeira ves tuir dialogu hanesan ne’e maibe ho ida ne’e hau bele fahe buat ne’ebe ohin hau hetan husi dialogu ne’eba hodi fahe ba kolega sira iha suku laran”, dehan Maria. (Eva Almeida/CJITL)

Foti husi: http://cjitl.org/index.php?
option=com_content&task=view&id=1355&Itemid=1

Sem comentários:

Enviar um comentário

counter for blogger
FETO-ALOLA FETO-ONU REDE-FETO FETO-EDUCA SAI-FETO FETO-JOVEM FETO-TIMOR FETO-LINKS